政情:信德同秦炳輝劃清界線

公務員事務局早兩日決定不延長首長級公務員冷河期,放生咗唔少退休公務員,但係原本打算轉職到信德中旅船務嘅前海事處助理處長秦炳輝,佢嘅轉職泡湯已成定局。信德中旅船務有限公司日前講明同秦炳輝再無任何聯繫,秦炳輝亦透過電郵回覆,證實已不再受僱於信德中旅船務。

秦炳輝去年四月退休,同年九月中去信公務員事務局,申請過檔信德中旅船務擔任署理工程總監,同年十一月半年禁制期屆滿,公務員事務局對佢嘅申請仍一如石沉大海,佢唔等答覆即返新工。由於佢未獲批已返工,加上信德船務與秦炳輝退休前嘅工作被指有利益衝突,引起輿論炮轟,公務員事務局即刻去信要求信德中旅暫緩秦嘅職務。

秦炳輝最近透過電郵向本報證實,已經冇做信德中旅份工,但佢冇透露自己有乜新動向,只係重申延長公務員禁制期無助阻止好似梁展文呢類個案,又形容自己係受害者,好無辜,仲諗緊是否就政府延長其禁制期採司法覆核,睇嚟政府都有排頭痕。

Money18免費即秒股票報價網站現推出8升級功能,財經資訊,實時實發!