政情：麥美娟踢王國興過海
前日舉行嘅荃灣區議會福來區補選，工聯會成功搶灘，一舉將打算保住議席嘅民主黨掃地出門。呢次補選嘅投票率高達四成一，喺區議會補選中甚為少見，負責為工聯領軍打補選戰嘅葵青區會副主席麥美娟，呢次成功展示工聯「食力」，立下大功，令佢送工聯新西立法會議員王國興返港島嘅計劃，打下一支超勁強心針，呢次真係有人歡笑有人愁。
大家不妨先睇睇○七年區選時，民主黨喺福來攞到一千七百多票，工聯只得一千四百多票，兩者差距有成三百多票，雙方實力有明顯差距。點知時移勢易，三年多下來此消彼長，工聯嘅得票一下子升到二千票多啲，相反民主黨就跌至一千票左右。喺呢兩次選舉中，雙方差距來回差咗過千票。民主黨得票，唔夠工聯會一半。
我哋再睇吓呢次補選嘅投票率有成四成一咁高，雖然及唔上○九年，前自由黨李躍輝喺大圍賄選嗰次四成九呢個紀錄，但係相比其他補選一般唔夠三成嘅投票率，顯然工聯喺呢次補選中，催谷咗唔少支持者出嚟投票。
有咁嘅結果，麥美娟絕對功不可沒。因為綜合局內、外人話，福來係一個以公屋、舊樓為主嘅舊區，人口老化得好緊要，勝負關鍵繫於有冇做好地區工作。如今麥美娟贏得漂亮，相信為佢喺工聯內部建立極佳聲望，大家唔好忘記，工聯會會長鄭耀棠打晒開口牌話，王國興下屆立法會可能會過返去港島選，若然屬實，工聯喺新西重點栽培嘅麥美娟自然係水漲船高，再加上呢次補選立功，自不然更加捨我其誰。
鐵頭仁跌落地
揸沙
不過有人歡笑有人愁，先講慘敗嘅民主黨，黨主席何俊仁尋日話，佢哋早料到呢個結果，事關工聯派出嚟參選嘅葛兆源係叻仔一名，三年前已經喺地區做工夫，而民主黨根本無諗過派人參選，只不過街坊好想佢哋派人，至勉為其難。鐵頭仁仲話，佢哋落敗同去年佢哋支持政改方案無關，始終區選較着重地區議題喎！最後佢仲好樂觀話，唔能夠由補選結果推算年尾區會結果嘅，唔知鐵頭仁會唔會過分樂觀咗啲呢？
至於有可能被麥美娟送一程嘅王國興，返去中產為主、戰情激烈嘅港島參選，佢要喺港島再打天下，成功機會梗係無留喺新西咁高啦，若然喺咁嘅方式為政途畫上句號，點講都有啲黯然，但為大局着想，無法啦。至於後事如何，咁就要留待下回分解啦！