中環出更：彭太帶女童軍外訪凱旋歸
女童軍唔易做，除咗日行一善，仲要係女鐵人。好似香港總監彭徐美雲上任後，就馬不停蹄開會，坐飛機多過坐巴士。七月中，彭太首次以總監身份出席喺蘇格蘭愛丁堡舉行嘅世界女童軍協會世界會議，返香港抖咗一日，又上京交流。
奪世界會議主辦權
講起愛丁堡之行，彭太好雀躍，同行仲有八位女童軍代表。會上遇見來自世界各地嘅女童軍，彭太同成班代表落力游說，終於攞到二○一四年世界女童軍協會世界會議主辦權，下屆開會，將會有逾六百名代表首次雲集香江，認真係有Face。
由蘇格蘭返到香港後，彭太連時差都未調校好，馬上搭飛機上京，參加香港青少年制服團體舉辦嘅「同心同根萬里行」活動，彭太仲係團長添，果然巾幗不讓鬚眉。
卓妮