中環出更：福臨門承先啟後不時不食
不時不食，看似嘴刁。富豪飯堂福臨門太子爺徐德耀（Daniel）卻堅持，食嘢要應時令、按季節。甚麼時候吃甚麼東西，佢計算得精密。民間幾近失傳嘅烹調秘方，Daniel當如珍寶般收集、搜羅。「中國烹飪學問有咁多好嘢，點解要學外國人，喺食物上吹泡泡，扮創新！？」
炎夏吃甚麼最好？Daniel捲起衫袖入廚，三味時令菜即時熱騰騰上枱。包括蝦子柚皮拌芥菜膽、油泡方利魚拌大地魚碎，及鳳眼果炆雞。福臨門選來廣西柚皮，由師傅反覆將之「揸水」，去除苦澀味，入口鬆化甘香。呢味餸，行會成員梁智鴻夫婦都話正。每年夏天，指定去福臨門品嘗。
油泡方利魚同樣考人，方利係矜貴海魚，Daniel選來野生方利：「阿爺教落，海鮮要野生先好食。」他將之起肉再炸成金黃色魚塊，連魚骨都炸得香脆，入口好似食薯片咁卜卜脆。
近日新鮮鳳眼果上市，正好用來炆雞。Daniel話，鳳眼果入口爽甜，卻無栗子咁飽脹，但因為剝殼時工夫多，坊間食肆好少做。佢卻不厭其煩，信念只有一個，就是保留傳統烹調技巧，才是福臨門靈魂所在。
○七年，Daniel放下喺英國嘅醫生厚職，回港接掌福臨門，從管理員工、入食材到燒乳豬，一一鑽研。Daniel爸爸及姑媽幼承庭訓，廚藝登峰造極。佢不時捉住兩人及行政總廚劉照成，叫佢哋口述，自己筆錄，一一整理鮮為人知嘅烹飪秘方。
用花崗石開響螺
福臨門滿載六十三年歷史，一杯一碟都係故事。Daniel帶卓妮走進福臨門廚房，如數家珍。睇見一舊巨型花崗石，佢會話你知，係爺爺徐福全嗰個年代用嚟開響螺用，沿用至今；貨架上一桶桶產自北非嘅花生油，都係爺爺年代一錘定音，至今不作他選。
所以Daniel只有一個夢想，就係帶領福臨門跨越年代，成為百年老店。
卓妮