弄巧反拙膠袋稅　環保官僚高大衰

所謂膠袋稅，官方叫法係膠袋徵費計劃，用意其實係寓禁於徵，每攞一個膠袋必須付出五毫，精明消費者當然慳得就慳，從而減少使用膠袋。之不過可惜吖，官老爺考慮不周，環境局甩甩漏漏。香港塑料袋業廠商會早前發表調查報告，顯示○九年推行膠袋徵費計劃至今，背心膠袋同穿孔膠袋嘅產量係就係下跌六成八以及兩成，之但係俗稱環保袋嘅不織布袋產量反而急劇上升九成六。原因非常之咁簡單，政府顧得個頭又顧唔到隻髻，小商戶唔准免費派膠袋之嘛，冇話唔准濫發環保袋。查實呢，不織布袋所含塑料成分比起普通膠袋多出幾十倍！

有鑑及此，「東方報業民意調查」睇睇小市民有乜意見。調查顯示，四成七受訪者表示自從膠袋徵費實施之後，家中無用嘅不織布袋愈來愈多；兩成二購買垃圾袋嘅數量較以前為多；兩成一認為商戶濫發不織布袋。整體塑料用量不跌反升，市民又點睇呀？三成四受訪者批評環保政策太多漏洞；三成覺得措施成效存疑；兩成八認為上有政策、下有對策。

呢嗱嗱嗱，本地官僚雖然後知後覺，不過都唔蠢得晒㗎，環境局為咗堵塞漏洞，建議膠袋徵費第二階段將不織布袋納入規管範圍，對於呢一個構思受訪者又點睇呢？三成三直斥環保政策失敗，只係識得向市民開刀；兩成八不滿政府冇檢討政策失敗原因，愈踩愈深；兩成六認為政策不完善，政府見招拆招。更加荒謬嘅係，擴大徵費範圍嘅同時，官老爺居然建議膠袋稅毋須上繳，所以受訪者普遍質疑難以監察、名存實亡以及自相矛盾。

唉，講到尾都係環境局局長邱騰華累事。你知啦，呢一位騰華哥哥根本唔係環保專家，完全冇先見之明睇到膠袋稅係會適得其反，難怪民間環保組織形容佢係「垃圾製造者」。事實又確係咁喎，源頭減廢又唔做，回收工作又懶理，只係獨沽一味徵收膠袋稅，遲啲仲採取半放棄態度，任由商戶收費不必上繳，試問保護環境有乜可能唔失敗？計功夫茶話齋，既然環保官僚高大衰，局長又係垃圾製造者，咁不如一腳伸佢哋落堆填區，另聘高明好過啦！