民主阿婆陳方安生有一個習慣，就係每逢社會有富爭議性嘅議題，佢會走出嚟發表偉論，驚死人唔記得佢。尋日公民黨有辦事處開幕，邀請民主阿婆出席，佢自然又施展抽水大法，話泛民應該派人參選下年嘅特首選舉，同建制派硬撼。其實民主阿婆唔係泛民政黨中人，泛民派邊個人出選特首，都唔係好關佢事，但佢經常走出嚟指指點點，都唔知邊個聽佢講。
民主阿婆早幾年想做泛民共主做唔成，不過佢依然對泛民參與特首選舉念念不忘，佢尋日被問到對下屆特首熱門候選人有咩睇法時，佢本來話唔會評論，但講講下又忍唔住口，話泛民要盡快諗定人選出戰，唔可以畀建制派獨領風騷。
剛出爐嘅替補機制呢排咁熱門，佢又點會錯過？民主阿婆話四個方案都無法律基礎，批評政府諮詢文件有誤導性，若喺法律觀點上有猶豫，就唔應該出台。