政情：選民力量演劇狂寸煲呔曾
一向以狙擊民主黨為己任嘅選民力量前晚搞搞新意思，喺柴灣青年廣場演出一套叫做《選民力量大戰9UP霸權》嘅舞台劇，一眾核心成員，好似人民力量主席劉嘉鴻、星屑醫生歐陽英傑、選民力量主席林雨陽同前港姐袁彌明等都落力演出，眾人更加以電視遊戲節目形式揶揄煲呔曾，令到全場拍爛手掌，大快人心。
話說有一節，幾位演員排排坐，模仿電視遊戲節目嘅玩法，開出好多條問題畀現場觀眾選擇答案，好似問大家，煲呔曾喺○八年發表施政報告時多次將「冗長」讀錯成乜呀、煲呔曾喺邊年喺立法會講粗口「狗噏」等等，總之全晚不斷與觀眾互動，每次恥笑煲呔曾時笑聲更加此起彼落，可見佢係幾咁乞人憎。
劉嘉鴻尋日話，成齣劇用咗約一個月綵排，劇本主要由星屑醫生負責，不過個個成員都有份畀意見。劉嘉鴻承認，選民力量今次搞舞台劇係刻意搞多啲噱頭，希望吸引非主流選民。