政情：張學明撐村屋加裝簷篷
香港呢排氣溫極高，動輒去到三十幾度，一個唔小心真係好易中暑焗到暈。新界鄉議局尋日就識歎喇，特登安排千幾名村代表同家屬去鄉議局新大樓劇院睇電影，氣氛極為熱鬧。副主席張學明仲識得打蛇隨棍上，話天氣炎熱，住村屋頂層就認真辛苦，希望發展局體諒村民處境，畀佢哋整番個簷篷喎。
發展局前一排已經公布咗新界村屋僭建問題嘅處理方法，部分依家視為僭建嘅天台簷篷可以暫緩執法，不過遲早都係要拆。張學明尋日就話，講得暫緩，應該至少都可以保留幾年嘅，不過呢類簷篷其實有實際需要，好似依家天氣咁熱，唔通真係時時刻刻開住冷氣咩，咁咪仲唔環保囉？張學明仲話，遲啲會再嘗試約發展局局長林鄭月娥落村視察，希望佢確切了解實際情況。
睇完戲，鄉議局尋日仲喺大樓擺咗八十圍盆菜宴，卅幾度天氣下無冷氣食盆菜，真係好有風味。