政情：林D9噴火撩交嗌
政府上周堅拒撤回替補機制，不但強行推出四個求其方案就叫做諮詢公眾，又無講清楚係咪四個方案都會符合《基本法》。泛民建制兩派齊齊發炮，政制及內地事務局局長林瑞麟喺公布方案當日，已經發火。原來佢仲未夠喉，佢尋日接受電台訪問時，更批評唔少議員係善變之人，話佢哋一時一樣，今日話支持政府，但過幾日又話唔得，只識跟隨形勢轉變立場。睇嚟佢不止發火，仲係撩交嗌添。
林D9尋日一個人上電台講替補機制點收科時，講講吓開始嚟料，話政壇議會中，有唔少議員都係善變，投票意向成日轉軚，令到政府拉票時有好大困難。「佢哋今日話無問題，過幾日又會話有好大問題。」不過林D9隨即又扮大方，話呢啲問題唔係淨係香港獨有，當年同董建華到美國見克林頓，講到政府喺議會無票時，對方都有同感話「I know it !」
句句有骨嘅林D9，本來都無指名道姓，但當主持人問到佢喺立法會畀議員窮追猛打有咩感覺時，林D9就將槍口對準林大輝，話大輝當日嘅言論唔係博士論文，根本係諗到咩就講咩，叫大家唔使仔細研究，暗寸大輝講嘢唔經大腦。佢之後向大輝再插一刀，話無一個人有資格，可以代替政務司司長唐英年出聲，矛頭直指同唐英年關係密切嘅大輝。
大輝：真心發炮冇抽水
大輝尋日話，無論林D9係咪講緊自己，都唔會對號入座，但佢重申上周五向林D9開火，係發自內心覺得政府做得唔好，所以講出嚟特別有力到肉，但唔代表抽水。工聯會王國興就認為，林D9與其喺度發空炮，倒不如認真解釋四個方案係咪完全無違憲仲好。
講番林D9，佢被問到做局長咁辛苦，點解唔「休息」吓，佢就話今次替補機制唔算得係乜嘢，自己見慣大場面，九九年居港權事件同○五年特首餘下任期定義風波，搞到北京人大釋法，呢啲先係最難忘。
除咗隔空向林大輝開火，D9亦向泛民「挑機」。泛民批評D9未有將「維持原狀」列為第五方案，但D9尋日反而辯稱，話已經將泛民意見白紙黑字寫入諮詢文件內，若泛民仲扮盲，係唔老實嘅表現。本身係律師嘅林D9今次撻着咗，丟咗個錄音機玩爆肚，睇嚟好戲在後頭喎。