中環出更：王國強荔枝豪贈高永文
蟬鳴荔熟，時令荔枝已出爐。廣東社團總會主席王國強（K.K.）喺東莞家鄉有大片荔枝園，趁荔枝豐收，早前搵司機返家鄉摘荔枝送千位摯友，骨科名醫兼防癌會主席高永文都榜上有名。
年紀大唔怕上火
世界真係小，高醫生早幾日約老友去潮州商會食晏，撞正K.K.設宴款待社團中人，連忙上前道謝，答謝K.K.送荔枝。東莞荔枝清甜又細核，K.K.早前搵司機穿梭中港兩地運荔枝，每位好友獲贈十幾斤，桂味同糯米糍都有，食到大家舔舔脷。一粒荔枝三把火，高醫生一口氣食廿粒。佢笑言後生時年少氣盛，食一粒荔枝已上火，如今年紀大，食多多都唔怕。高醫生咁捧場，K.K.即場送多廿粒。
身為「家己冷」嘅高醫生，順便向卓妮推介潮州菜，「飛佛」係半煎煮馬友。八月中，高永文將跟隨潮州商會拉隊考察潮汕三市美食，參觀薄殼養殖場，又訪尋重達七十斤嘅巨型老鵝，之後用古法烹調，聽見都流晒口水。