中環出更：名人書展獲益良多
書展除咗有書睇，最吸引人嘅莫過於有機會出席作者嘅講座，同佢哋作面對面嘅交流。尋日卓妮就去咗聽大家樂主席陳裕光同書迷分享管理之道，又去咗聽前首席大法官楊鐵樑同新抱楊余夏卿介紹佢哋睇開嘅書，仲有性博士吳敏倫講婚姻經營之道，節目豐富。
性博士分享夫妻相處
作為一個有萬五個員工嘅企業領航員，陳裕光要面對嘅問題都唔少，所以佢經常都會睇唔同嘅書，從中學習管理之道，佢嘅新書叫做《為您做足100分》。佢深明細節決定成敗，好似拖地、執枱呢啲細節，佢做老闆都會執得好仔細。佢仲話飲食業傳統文化係鬧人、重錢重利、討價還價，不過佢覺得依家應該改變，要好似雁字飛行咁各司其職、輪流做領航員等，唔可以再用大水牛文化。早幾個月最低工資搞到大家樂好多風雨，陳裕光睇幾多書學管理，相信都唔會學到最低工資畀佢上嘅慘痛一課。
至於性博士吳敏倫佢同太太結婚卅九年，吳太話佢哋感情有增無減，好到不能再好，尋日佢喺講座都教為夫者要愛妻，因為兩夫妻感情好，自然生產力都提升，所以將愛情放第一位，幸福就會嚟，可惜由細到大都無咩呢種愛的教育。
楊官同佢媳婦都係愛書之人，兩個人睇書嘅口味都好似，有時仲會交換書睇添！楊太嘅手藝好出色，不時會做楊官嘅一家之煮，楊太仲大讚老爺好似爸爸咁錫自己。
卓妮