規管離職高官再就業嘅檢討，始於○八年發生嘅梁展文事件，立法會用特權法查咗兩年，查到去年底都查完晒，政府一直遲遲唔肯公布檢討嘅結果，賴有好多法律問題要解決，卒之拖咗大半年，等到尋日替補機制諮詢文件出爐，先至緊隨其後公布。
睇番當局提交立法會嘅文件，白紙黑字寫明檢討結果已喺六月廿八日嘅行政會議討論，咁都仲要拖多成個月先至公布，你話唔係夾埋都冇人信啦！
唔單止咁，金管局同發鈔銀行尋日又公布發行新銀紙，真係夾都冇咁啱，斷估政府唔係以為用張新銀紙嚟遮醜啩？
其實港府都唔係第一次耍呢啲花招，市民嘅眼睛咁雪亮，夕陽政府不如務實啲，專心改善施政好過啦！