政情：楊志超分享創業秘訣
成功創辦「G.O.D. 住好D」嘅楊志超，日前出席香港青年協會喺書展嘅講座，分享創業心得。佢話做事一定要有聚焦點，好似佢一直想將香港文化變身，就成為佢成功嘅元素；其次係要有「憤氣」，佢話當年因為唔想畀家族人睇低，於是走出來創業，化憤怒為力量；最後係要開闢自己條路，做自己好奇嘅事，咁樣先可以令自己滿足同開心，繼而有動力做落去。
楊志超最近又有新嘅聚焦點，佢話想開一間唐樓酒店，等遊客體驗有香港特色嘅板間房風味，仲打算開餐廳，以街市照雞蛋嗰盞紅色膠燈作藍本，希望食客喺燈下開餐，夠晒特色。不過，佢提醒年輕人千祈唔好因為同老闆唔夾就貿然走去創業，事關依家有啲大公司會將成個部門交畀有能力嘅員工打理，情況同自己做生意無分別，但蝕就蝕公司，呢個如意算盤打得過。