中環出更：張灼祥轉型搞棟篤笑
拔萃男書院校長張灼祥書卷味濃，佢年年都出書講吓人生見聞，或者寫散文抒情，多年來已擁有唔少忠實粉絲。尋日佢現身書展嘅讀者分享會，唔少男拔老師去撐場，但就唔見學生，反而多咗唔少「死敵」名校聖約瑟書院嘅學生喺度。校長興之所至，自爆同另一「死敵」名校喇沙中學前校長Thomas修士嘅一段陳年趣聞。
寸「死敵」唔救自己
張校長話，外間成日話聖約瑟、喇沙係男拔嘅「死敵」，實情絕對唔係咁，大家千祈咪被謠傳蒙蔽。佢講起十年前同Thomas一齊出差去外地，兩人趁休息時間去海邊暢泳，期間有人浸親，英勇嘅Thomas奮不顧身救人，令張校長十分欽佩。張校長問大英雄：「如果係我浸親，你會點做？」Thomas妙答：「我會為你祈禱！」語畢，引到現場聽眾笑爆肚。
張校長愈講愈起勁，話明年想搞場棟篤笑，講乜嘢主題仲未諗到，等下星期一去睇完張達明嘅棟篤笑騷先講喎。有人提議佢去紅館做，但校長鍾情規模細啲嘅酒吧或私人會所，如果成事，睇怕哄動程度唔輸畀大明星。
熱衷推廣英國文化嘅「上海灘」中式服裝店創辦人鄧永鏘，尋日都喺書展現身，佢同四位來自英國文壇好友對話，暢談文學與寫作，帶領讀者遨遊英語世界，唔少老友一家大細去撐場！