咦，莫非公主病同王子病並不局限於心智未成熟嘅小學雞？抑或財爺曾俊華胡亂派錢每人六千銀造成錯覺，好人好姐以為凡事都有權伸大手板問政府攞錢？咁怪誕嘅場面，出現於兩間大機構。
先講天星小輪吖，早前向政府申請加價，往來尖沙咀至中環及灣仔兩條航線每程加價兩毫至六毫不等，加幅高達一成至兩成二，希望明年元旦落實咁話。
天星小輪又提出另一個方案，目的係要求政府利用公帑補貼。現時六十五歲或以上長者乘搭上述兩條航線係免費嘅，天星建議長者票價維持免費，之不過咁，期望政府補貼因此而每年少收嘅五百二十萬元。如果有得補貼咯喎，天星就可以凍結成人平日票價，周末及假日票價加幅亦都可以下調，由加價六毫減至加價三毫，即係每程三元三角。
加價理由來來去去都係嗰幾味，燃油價格上升喎，最低工資影響喎，預期今年虧蝕一百九十萬元，若然明年未能如期加價，虧損就會擴大至五百五十萬元喎。
功夫茶唔同你計婆乸數，淨係想問一問天星小輪袞袞諸公，香港到底奉行資本主義定係共產主義？私營機構如果想食大鑊飯，唔該行遠啲啦。之不過咁，家陣偉大祖國都唔再相信共產主義，要食大鑊飯睇怕要去北韓，會唔會因為缺糧饑荒而餓鬼死你係另一回事。
伸大手板問政府攞錢嘅唔止天星小輪，剛剛先至喺五月中加價百分之三點六嘅九巴公司，以加價不足以抵銷成本上升為由，促請政府成立票價穩定基金。簡單咁講，九巴公司要求政府利用公帑補貼。
好彩民望低殘嘅政府都唔蠢得晒，運輸及房屋局發言人就話嘞，公共交通服務應由私營機構根據商業原則營運，當局要公平對待不同公共交通營辦商，確保公帑用得其所，避免提供錯誤誘因，影響營辦商應有嘅節流力度以及服務效益。
唉，獅子山下嘅香港精神難道好似維權藝術家艾未未咁樣「被失蹤」？香港精神就係自強不息，香港精神就係發憤圖強，香港精神就係不屈不撓，精神委靡嘅天星小輪同九巴公司開到聲問政府攞錢，唔通想做超大號綜援人士？唔好玩啦，此例一開肯定後患無窮，阿貓阿狗都話要政府補貼，庫房再水浸都冇可能每間私營機構都走去派錢啫！
由此可見，公主病同王子病確係已經落地生根成為風土病，連私營機構都病懵了，望只望呢一種小學雞行為唔會得逞啦，否則香港引以為傲嘅自由經濟體系恐怕要換招牌咯！