尋日酒店業界發生騎呢產子案，有內地大肚婆突然喺酒店作動，仲即場生埋對雙胞胎嬰兒出嚟添。香港酒店業主聯會執行總幹事李漢城就呻話，即使資歷深嘅酒店職員，對住個大肚婆，就算個肚幾大個都好，都根本唔識分個肚有幾多個月大，亦無可能拒絕佢哋入住，酒店最多都係打九九九求助，又話最衰都係入境處把關不力，只要佢哋做好把關工作，件事就唔會發生喎。
