政情：鼠王芬民望跌至新低
「懲罰選民論」令專業會議立法會議員梁美芬（鼠王芬），成為網絡大紅人，但出名都分為好與壞，而佢嘅「紅」就係壞嗰種，事關有民調顯示佢嘅評分創出上任以來新低。香港研究協會今個月十一至十八日用電話隨機調查，成功訪問咗一千四百五十名十八歲以上市民，以六分最高分，鼠王芬評分大幅下跌0.38分，僅得2.26分，喺九龍西排包尾。
唔單止咁，鼠王芬喺三十位直選議員中排尾二，排喺包尾嘅長毛梁國雄之上。不過，公平啲講，今次調查其實有六成直選議員得分都下跌，只係鼠王芬成績過分突出，搶晒其他人風頭啫，好似公民黨黨魁梁家傑，得分亦都跌0.33分，民建聯陳鑑林同李慧琼得分都分別下跌咗0.29及0.24分，上述幾位建制派議員得分都唔合格，區議會選舉臨近，睇嚟佢哋真係要努力啲先得喇。