中環出更：項明生：肚中墨勝事業線
盛暑仲夏，冇嘢好得過匿喺冷氣房做條大書蟲喇！身兼旅遊作家嘅Sony Computer Entertainment香港市場部總經理項明生（James），近日就頻頻喺書展出沒，佢唔止以作家身份為本新書《十日敢動假期：墨西哥、古巴》瞓身宣傳，仲以粉絲身份與偶像近距離接觸，以行動貫徹「以書會友」。
卓妮前日喺書展見到James喺度巡視新書嘅銷情，期間巧遇靚女粉絲，於是喺新書中簽名留念，氹到個粉絲不知幾開心。向隅嘅讀者們唔使嫉妒，事關明日（廿三日）下午一點半，James將喺會展N206室舉行分享會，預咗到時簽名簽到手軟㗎喇！
讚林青霞有書卷味
James話明日做完分享會後，會過隔籬房捧偶像林青霞場，佢讚青霞唔止清秀美麗，仲好有書卷味，保持氣質歷久不衰。
講起g模，原來兩年前James曾經因為預算不足，搵咗g模為遊戲展搞宣傳，可謂係搵g模助陣嘅始祖，但係僅此一次，事關佢覺得女仔靠「事業線」不如靠肚中墨水喎。
當日港大專業進修學院院長李焯芬都在場，佢被廿幾個五歲以下嘅小豆丁圍住，好似慈祥爺爺咁講故事。James特登送本新書畀李焯芬，事關李教授幫佢寫序，仲讚佢文采好，James猛話受寵若驚。
卓妮