中環出更：周國豐捱窮 嘆基層難撈

成日話搵食艱難，已故名人周啟邦之子周國豐（Brandon）堂堂一個大律師，講艱難理應點都輪唔到佢。不過，佢之前參加咗電台節目《窮富翁大作戰》，體驗每日只可以用五十蚊嘅窮人生活，又要做速遞員同珍珠奶茶店店員呢啲基層工作，雖然只係短短四日，但Brandon都忍唔住大呻辛苦，仲慨嘆︰「冇學歷喺香港真係好難生存。」
周國豐（前排右）尋日同一班學生分享佢做「窮富翁」嘅體驗。 （馮惠詩攝）
周國豐（前排右）尋日同一班學生分享佢做「窮富翁」嘅體驗。 （馮惠詩攝）

速遞文件沖奶茶

Brandon尋日同一眾八十後、九十後分享番佢做「窮富翁」嘅生活體驗。佢話喺節目中各做兩日「沖奶茶仔」同速遞員，開頭以為做速遞成日有車坐，點知原來好多時候都係靠行路，仲試過蕩失路送貨遲咗畀老闆鬧添。佢話：「原本諗住啲文件送送吓會輕咗，點知啲公司會畀番啲文件你，所以去嗰時孭住十公斤，分分鐘回程會有二十公斤。」

至於喺珍珠奶茶店返工，Brandon就嫌間舖頭又熱又窄，連食晏都要踎喺度食。佢體驗過窮人生活後，依家就同一個社福機構搞緊獎學金同師友計劃，諗住幫啲年輕人讀書同搵工咁話喎。

資訊科技界立法會議員譚偉豪（IT豪）尋日都有出席活動，談到低學歷、低收入嘅年輕人係咪注定冇出頭天，佢就話︰「唔同時代都有唔同困難，以前香港靠工業，依家香港冇，鄰近深圳有。」又話深圳好多年輕人冇讀過大學都滿懷理想，點解香港人唔可以喎。

周國豐曾經喺節目中做速遞員，佢尋日諗起都大呻好辛苦。 （資料圖片）
  • 周國豐曾經喺節目中做速遞員，佢尋日諗起都大呻好辛苦。 （資料圖片）
周國豐亦喺節目中做過珍珠奶茶店店員。（資料圖片）
  • 周國豐亦喺節目中做過珍珠奶茶店店員。（資料圖片）

學生寸IT豪廢噏

佢嘅言論隨即被一名中學生寸爆︰「咪即係喺香港冇出路囉，你估返大陸發展咁容易咩！」搞到IT豪面懵懵。

卓妮

Money18免費即秒股票報價網站現推出8升級功能，財經資訊，實時實發！