嘩嘩嘩！又嚟又嚟，公立醫院又發生奪命醫療事故！
今次呢一單個案非常之咁離奇，本來係冇可能發生嘅，偏偏就真係發生咗。威爾斯親王醫院一名患有高血壓以及心臟病等等多種疾病嘅七十三歲婆婆，上星期由於氣促入院，醫生巡房發現婆婆服用五種錯誤藥物，懷疑係一名上班只有八日嘅實習女醫生擺烏龍。食錯藥之後，婆婆血壓驟降又腎衰竭惡化，延至星期一死亡。
公立醫院開錯藥都唔係第一次㗎啦，因乜事幹話係非常之咁離奇？原來喎，初步調查發現當晚負責診治婆婆嘅駐院醫生已經親自填寫藥紙，唔知點解嗰一名實習女醫生居然將藥名再抄一次，而抄嘅係五種屬於另一名病人嘅藥。即係話，只要實習女醫生唔做節外生枝嘅多餘動作，食錯藥害死病人嘅慘劇根本唔會發生。大家話嘞，係咪離奇？
功夫茶真係想訪問一下出事嘅實習女醫生，點解咁手痕呢？係人都知公立醫院人手短缺，醫護人員買少見少，免得過都唔好做重複工作啦，留番精力救死扶傷好過，搞乜鬼將藥名再抄一次呀？貪過癮呀？練書法咩？即使戇居居白費心機走去抄，都唔好發雞盲抄錯吖嘛，大姐！
嗱嗱嗱，你唔好話盂蘭節臨近，鬼門關大開所以搞到醫生撞邪，呢家嘢可信程度一來極低，二來咯喎，賴地硬都唔好賴鬼神，導人迷信就唔好啦，有辱醫生嗰一件白袍呀。
唉，講到尾都係醫管局本身存在十分嚴重嘅問題，失敗管理造成千瘡百孔。如果新丁醫生有資深醫生全程監管，就算抄錯藥都未必會死人。打個譬喻吖，一份報紙嘅最後把關者唔應該係一個新入行嘅編輯，必須由老總拍板下令先至可以出街，避免起錯題之類嘅烏龍事件吖嘛。同樣道理，新丁醫生唔應該係一個病人嘅最後把關者，送藥入口呢一個咁重要嘅步驟必須由有經驗嘅前輩負責。
所以話啫，食衞局局長周一嶽以及醫管局一眾庸官劣吏確係害人不淺。人手短缺固然容易忙中有錯，制度甩漏又冇人想方設法撥亂反正。醫療事故害死人本來一單都嫌多，偏偏香港病人無辜枉死嘅不知凡幾。
功夫茶都想訪問一下連番失誤嘅醫療庸官，點解咁腦殘呀？開錯藥又有，輸錯血又有，割錯胸累到女病人無乳問蒼天都有，百病叢生嘅醫療系統幾時先至可以康復呀？如果病源係周一嶽，當佢癌細胞快啲切咗佢啦，唔該！