廿二萬人上街，令政府宣布押後表決替補機制，但政府無將替補機制撤回，係都要留番條尾巴畀人砌。公民黨有見及此，黨魁梁家傑決定帶埋力捧嘅新星郭榮鏗到美國同加拿大，實行唱衰替補機制，希望可以帶起外國輿論，迫使政府收回惡法。
公民黨今個月中就會去美國同加拿大七日，旋風式拜訪極右組織傳統基金會、參議院同眾議院等，袋巾傑話，屆時見到多位美國名議員，一定會當面唱衰替補機制，講到明呢個機制有幾醜惡。
袋巾傑話，估計政府進行假諮詢後，會將原方案再度提出，所以一定要做好抗爭嘅心理準備，再次上街。
順帶一提，上次袋巾傑過去美、加時，只得自己一個，但今次就帶埋執委郭榮鏗去。呢位仁兄來頭唔細，傳聞公文袋將力捧佢，先畀佢喺區議會熱身試操，如果效果理想，分分鐘叫佢代表公文袋，參加明年嘅區議會超級議席選舉。