政情：市政局時間囊被遺忘
立法會快將搬遷到添馬艦，下周一將會舉行一連串惜別活動，其中一個重頭戲係開啟埋藏喺地底嘅一個時間囊，展示議員喺九七年回歸前擺放嘅一批物件，活動令議員感觸良多外，同時亦都勾起當年慘受「殺局」嘅前市政局議員嘅傷痛。原來九九年市政局亦因為「殺局」而喺中環大會堂紀念花園埋下時間囊，至今已經十一年，但開啟無期。
雖然好多人已忘記咗市政局時間囊呢回事，但當年深受「殺局」傷痛嘅市政局議員李華明近日就發現時間囊埋藏位置之上，竟然有一座大型花卉壓住，如果當日冇份見證時間囊「落葬」，根本唔知嗰度有個時間囊。肥仔明批評，當局唔應該扼殺歷史，又憶述當日自己將一隻Elton John嘅CD放入時間囊，為當時Elton John因跑馬地居民反對而未能如期來港開演唱會留下印記。
前市政局議員王國興都批評，當局有關做法「離譜」，完全無視市政局年代嘅歷史，同時至今都唔知邊個部門負責處理市政局時間囊，佢促請當局盡快交代事件︰「究竟係發展局轄下古物古蹟辦負責，定係民政事務局等，希望當局快啲交代清楚。」