政情：D姐遲交功課累街坊
政府委任嘅檢討委員會及立法會專責委員會，早已就梁展文事件發表報告，不約而同要求收緊對離職高官再就業嘅限制，以及改革負責審批有關申請嘅離職公務員就業申請諮詢委員會（離諮會），但由於公務員團體強烈反對，公務員事務局局長俞宗怡（D姐）至今都未公布最終改革建議，連累政府要違規延長離諮會其中一個委員嘅任期，陷該委員於不義。
政府尋日公布再度委任多名離諮會委員，大部分都係續任兩年，唯獨做過律師會會長嘅葉錫安就只係續任一年。翻查資料，原來葉錫安早喺○五年中已經加入離諮會，已做足六年任期，但今次再續任一年，明顯違反不可連續出任同一公職六年嘅規定。官方回應係要維持離諮會工作嘅順暢同持續性，但實際原因相信係同當局遲遲未公布梁展文事件改革建議有關，令全體離諮會委員被迫齊齊「再坐一會」。