政情：范太選特首忽然心大心細
玩足兩個月之後再度活躍嘅全國人大常委范徐麗泰上星期六宣布考慮選特首，又話有市民支持佢，唔可以辜負市民嘅期望。
承認管治經驗不足
事隔唔夠一個星期，佢尋日又話自己嘅管治經驗唔夠「鐵三角」嘅其中一人、政務司司長唐英年咁好，「唔通我依家去考AO（政務主任）咩。」唔通佢諗諗吓，忽然又撐番唐英年？
選特首咁大件事，當然要多角度反覆思考。范太一直好率直，話自己年紀大、身體唔好，又唔熟悉經濟，佢尋日出席一個公開場合，又承認自己嘅管治經驗唔夠唐唐咁好。除咗咁，有電視台尋日播出佢嘅訪問，佢又自爆另一個唔應該參選嘅理由，就係家人唔支持佢。「參選係一件比較辛苦嘅事，佢哋都唔希望我去參選。如果幸運地選中，佢哋就更擔心。」講到佢一直無時間照顧家人，對家人有愧於心，就更加講到語帶哽咽，要深呼吸至可以講落去。
政治之所以峰迴路轉，可能因為政治人物心大心細，當然選唔選特首，唔係憑個人主觀意願就可以決定。