政情：臨記撐場鼠王芬拍劇？

正當網民廣泛轉載呢個印巴裔「臨記」演員底細之際，尋日就有位聲稱係相中嘅印巴裔男粉絲主動打電話嚟本報交代呢次「撐鼠大行動」。佢自稱名叫陳振華（Ricky），今年廿八歲，正職係髮型師，亦曾經拍攝電影《機動部隊—伙伴》，但強調唔係網民所講嘅「臨記」，而係擔任特約演員。佢話由於遭人起底，所以尋日電話響唔停，直言「我都唔知發生咩事，總之我好驚！」

稱為少數族裔爭權益

為咗證實呢個Ricky係當事人，我哋叫佢自拍一張相嚟睇吓，點知佢話唔記得自己個電郵係乜，最後提供咗個「hotmail.com.hk」嘅電郵。呢個Ricky又話，自己一向關心南亞裔人士喺香港遭人歧視嘅問題，咁啱前日有個朋友無端端打電話畀佢，叫佢去立法會撐鼠王芬，聲稱鼠王芬關心少數族裔喎。跟住佢就單人匹馬去咗立法會門外加入「撐鼠大行動」。

不過，Ricky話到現場聲援完畢後，鼠王芬未有同佢討論「關注少數族裔」問題，只係收咗花、影咗相就鬆人，話改日再討論喎，但佢聲稱，唔覺得自己畀鼠王芬呃咗，總之支持咗佢就OK咁話。最令人奇怪嘅係，對於呢次撐鼠大行動，鼠王芬話唔想多回應，但矢口否認自己有畀錢請人支持自己，其他嘢唔想講太多，總之叫大家畀啲空間佢喎。

立法會門外咁「溫馨」，但立法會入面就相當現實，連平時唔聲唔聲嘅勞聯李鳳英尋日都撲埋出嚟，講明要喺明年立法會選舉到九龍西搶位，美其名係勞聯喺深水埗服務十幾廿年，係勞聯大本營，但大家都心知肚明，家吓鼠王芬大勢已去，繼工聯會放風想搶鼠王芬個議席後，勞聯都想「趁你病，攞鼠命」，難怪有傳鼠王芬尋日喺立法會前廳偷偷飲泣囉！