中環出更：台灣幫正名受勳雙喜臨門
台灣幫喺香港生根幾十年，最近終於修成正果，唔單止作為最高駐港機構嘅中華旅行社今日正式更名為「台北經濟文化辦事處」，港澳台灣同鄉會會長王茂林今年更獲頒發榮譽勳章，以表揚台灣人喺香港熱衷慈善嘅愛心，確實係雙喜臨門。
台港政商 現身同樂
日前台灣幫就喺尖沙咀The One嘅「煌府」歡聚，除咗台灣僑領及政商界人士之外，唔少同台灣關係密切嘅本港政商界人士都現身同樂。好似擔任台灣同鄉慈善基金會舉辦嘅「愛心獎」評審委員會主席嘅前高官藍鴻震、「台灣女婿」機場管理局行政總裁許漢忠等人，都同太太拍拖現身。
月初突然被調返台灣嘅前光華新聞文化中心主任羅智成，亦專程回港接受眾人為佢餞行。佢調派來港只得一年零三個月，係任期最短嘅主任，但見證光華併入升格後嘅台北經濟文化辦事處，總算不枉此行。
卓妮