種族歧視呢家嘢，當然係唔可以接受o架啦，中國人既然經常受到歧視之苦，乜鬼嘢「東亞病夫」呀，乜鬼嘢「華人與狗」呀，更加冇理由掉轉頭歧視非我族裔。所以咯喎，《種族歧視條例》已經於○九年七月生效，歧視被列作罪行。勢估唔到嘅係，肩負作育英才神聖任務嘅教育局，居然係第一個可能犯法嘅政府部門！
教育局局長孫明揚非法僭建都未夠，喺佢管治之下嘅教育局係點樣涉嫌種族歧視嘅呢？係咁嘅，平等機會委員會質疑小一派位制度，以及現行有關少數族裔入讀指定學校等等相關安排，有直接同間接種族歧視之嫌，可能違反《種族歧視條例》。所以咯喎，平機會公布《少數族裔教育工作小組報告》，建議從學前教育開始，為少數族裔學生提供語言及文化學習計劃，並且制訂適合嘅中文課程同測試系統，提供升學及就業所需嘅中文評估資歷。
簡單咁講，少數族裔面對嘅最大障礙係學習中文，萬一中文唔合格就難以升讀中學同大學，偏偏教育局冇提供適當嘅中文課程。平機會主席林煥光係咁講嘅：「佢哋小學中文學唔好，中學派位自然派得差，直接影響入大學及往後前途！」
仲有一家嘢非常之咁唔公平，少數族裔一旦未獲派位入讀最鍾意嘅主流小學，竟然會自動派去專收少數族裔嘅指定學校，而唔係另一間冇咁鍾意嘅主流學校。你知啦，少數族裔家長都有望子成龍心態，希望子女能夠入讀主流學校，從而透過知識脫貧，教育局大玩「自動轉帳」把戲將佢哋送去指定學校，即係剝削佢哋嘅機會啫。關注少數族裔權益團體融樂會總幹事王惠芬就批評嘞，不少指定學校有多達九成學生係少數族裔，送佢哋入讀係變相嘅「種族隔離」，已經構成直接歧視；即使少數族裔能夠入讀主流學校，往往又因為學校欠缺支援而未能學好中文，咁就構成間接歧視。
唉，講真，唔少南亞裔人士根本就係土生土長嘅香港人，廣東話隨時流利過開口夾着脷嘅達官貴人，尤其係Ngon Ping Sam Luk Ling都噏得出嘅政務司司長唐英年，因乜事幹要歧視佢哋呢？問題只不過係，佢哋識講未必識寫，教育局冇提供適當中文課程，好唔啱數啫！
少數族裔讀書難，消除歧視莫等閒。計功夫茶話齋，教育局唔好再玩嘢，必須撥亂反正，否則平機會嬲嬲地告上法庭，到時咯喎，被歧視嘅將會係教育局裏面辦事不力嘅庸官！