政情：陳新滋籌旗幫人還債
夾心餅好食，但夾心人一啲都唔好做，浸大酒樓聯福樓上月結業，到依家都仲拖欠幾十個工友遣散費同埋假期補水合共八十幾萬，咁多錢冇咗，工友唔嘈就假。校長作為夾心人無計可施，惟有同幾位副校長同財務長等自揼心口捐錢協助班工友，希望師生都捐啲。
聯福樓結業，校方之前發還咗一半按金畀聯福樓承辦商，等佢哋可以發放六月份薪金畀工友，但剩番嘅一半根本唔夠畀酒樓拖欠緊大學嘅水電煤費用，如果畀埋工友，即係變相要大學自己用資金補番嗰啲水電煤開支，大學係公營機構，當然唔可以用公帑補貼外判商。
揼師生心口遭非議
校長陳新滋尋日惟有出個電郵畀全校師生解釋件事來龍去脈，又話喺唔動用大學資金嘅原則下決定發起募捐行動，佢同幾位副校長，財務長已身先士卒捐咗，呼籲大家齊齊捐錢協助工友。不過有監察浸大嘅團體就唔係咁睇，佢哋批評校方「私吞」餘下按金，再以他人捐款抵償自己未盡之責，係貓哭老鼠咁話喎。