特首選舉開始進入互揭瘡疤嘅階段。全國人大常委范徐麗泰繼前日不點名批評有人成日公開品評各項社會問題同政策，講好多市民鍾意聽嘅說話，但講得出並唔代表做得到，暗寸對方淨係得把口。
行政會議召集人梁振英（CY）尋日疑似對號入座，並反寸有人缺乏班底，高民望但冇參考價值等，好似同范太喺度隔空互插。睇嚟特首之爭已縮窄為呢兩人嘅對決，其他疑似特首候選人唔通已經收咗皮？
CY尋日接受亞視專訪，強調自己前後寫咗不下五十萬字品評香港各項問題同政策，背後當然有大批人幫佢獻計，暗示自己班底雄厚，唔係臨急先至諮詢各界搵對策。
CY對於民望一直包尾，自我陶醉話，自己民望近來節節上升，又話唔撐復建居屋、增建公屋同樓價回落嘅人，自然唔鍾意佢，呢個係「政治扣分制」，有啲人成日迴避評論各種問題，民望高都冇參考價值，寸范太寸到上心口。
范太同CY接連隔空互插，反觀另一疑似候選人政務司司長唐英年，就好似失咗蹤咁，尋日淨係有佢嘅前自由黨黨友田北俊幫佢還擊，喺呢場范梁之爭當中，顯得有心無力。