政情：撐艾未未李立偉不惜劈炮
西九文化區蹉跎多時，依家總算有番啲眉目，尋日剛剛試用期滿嘅西九M+博物館行政總監李立偉（Lars Nittve），對西九亮點之一嘅M+充滿信心與野心，佢仲毫不避忌咁話，內地維權藝術家艾未未係全球最重要藝術家之一，想喺M+放艾未未嘅作品？當然無問題啦！如果真係有審查的話，佢會毫不猶豫劈炮唔做。講到咁激，李立偉真係勇氣可嘉，怕只怕佢變成西九管理局另一位爛頭蟀咋。
今年一月先至正式上任嘅李立偉，尋日先至正式過晒半年試用期，上晝佢去咗立法會講M+，晏晝同傳媒又係講M+，認真三句不離本行。佢對M+嘅野心，在於希望打造M+成為為港人而設嘅博物館，兼且係亞洲區博物館模範之餘，仲要M+成為本地藝術家走向世界嘅平台，同埋一個教育設施。
老實講，李立偉嘅鴻圖大計做唔做得成仲係未知數，尤其香港係一個充滿政治角力嘅地方。不過一問佢會唔會畀艾未未嘅作品擺喺M+，佢就斬釘截鐵話得，因為佢相信法治、自由係香港嘅基礎，所以絕不接受任何審查，若然因為咁而唔畀佢展覽某樣嘢，佢會立即執包袱走人。呢番說話換轉係特區高官，怕且諗都未諗過，或者諗到都未必講出口，再唔係就口講一套、做就另一套，而李立偉雖然都算身居要職，但話晒係來自民主自由嘅瑞典，難怪可以咁清心直說。
無思鄉病發
大家都記得唔撈西九嘅大有人在，早期就有行政總監程少泉返七日工快閃，今年就有夠晒爆嘅行政總裁謝卓飛，疑似不堪壓力走人。李立偉初嚟甫到，剛剛坐正就爆出咁勇猛嘅言論，立此存照，希望佢唔會因此而成為第三人啦。據佢自己所講，至今佢同西九董事局主席唐英年合作得好好，無論喺任何方面，唐英年都無畀過佢任何壓力，至於嚟咗香港咁耐，佢亦無思鄉病發作，總之一切都好順利咁。
依家李立偉已經喺香港落地生根，家住淺水灣，辦公室就喺尖沙咀，難怪佢咁享受喺香港生活啦。佢仲大讚香港嘅食物質素，難怪港人對食物咁沉迷喎。