中環耳目：容永祺擦紅蝦意粉賀受勳
專業及資深行政人員協會創會會長容永祺（Samuel）早前獲頒銀紫荊勳銜，老友爭住請食飯慶祝。Samuel至愛銅鑼灣開平道星級意菜Da Domenico，好友一於訂枱擦餐勁。Samuel係熟客仔，甫坐低，指定要柯打招牌紅蝦意粉，呢味意粉，佢食足五年未覺厭。每逢有喜慶事，來一碟紅蝦意粉，會將興奮指數，推上一百分。
小學時當一家之廚
Samuel唔怕膽固醇高，意大利西西里紅蝦大啖吃，蝦膏滲透每一條意粉，啖啖是濃香。不消十分鐘，意粉已掃清。講起煮意粉，Samuel係高手。讀小學時，佢已經係「一家之廚」。佢坦言，小時候家境並不富裕，爸媽、兄姐要外出工作，由佢去買餸煮飯，係家常便飯。如今事業有成，開爐煮飯，只係為興趣。反而，佢愛四出「搵食」，上至米芝蓮星級餐廳，下至大牌檔小炒，都會有佢心水之選。
暑假到，Samuel本來諗住跟隨專資會成員遊東非探險。但大仔喺英國完成法律學位，可喜可賀。佢同太太一於飛去當地，見證囝囝戴四方帽。