中環出更：小母牛慈善宴競投熱烈
所謂積善之家，必有餘慶，卓妮早幾日就喺小母牛慈善晚宴，見識到小母牛籌委會主席「快勞夾大王」杜振源（Simon）一家人嘅強勁凝聚力。除咗家人，老友亦同樣支持Simon，好似莎莎老闆郭少明身在外地，隔空叫老友代佢用七十八萬蚊投得已故畫家方召麐嘅作品。喺無錫趕返嚟嘅「電子大王」顧明均，仲將即投嘅近三十七萬蚊名酒，即場開畀賓客品嘗，認真大方。
小母牛早前喺銅鑼灣怡和街富聲筵開六席舉行慈善宴，出席嘉賓位位都係買枱入座嘅善長，Simon全家出席支持，到咗拍賣環節，二女泳璇率先舉手，叫到十萬，細佬擴業見家姐鍾意呢盤「熟蒂甘香」陶瓷，即時舉手叫多一萬投畀家姐，搞到泳璇好感動。Simon細佬杜振安一樣兄友弟恭，用五十萬一千元投咗三支名酒，以行動支持Simon。
杜振源三頭鮑贈愛妻
至於Simon，係不折不扣嘅愛妻號，佢見太太一到場，就對馬會大董李國棟醫生捐出嚟嘅三頭鮑愛不釋手，不惜同眾人拗手瓜到七十八萬先買到，李醫生話三頭鮑放咗喺屋企多年都唔捨得食，所以寧願捐出嚟做善事，不過杜太都會好好對待呢啲鮑魚，講明如果食，就會搵名廚楊貫一嚟主理，絕對唔會暴殄天物。
原本諗住可以籌到二百萬元嘅Simon，結果連埋賣枱，差唔多超額三倍完成目標，難怪身為香港分會主席嘅梁錦松都話對Simon十分滿意。講開又講，阿松同Simon一樣有三個仔女，又一樣係愛妻號，兼且都係積善之家，所以佢用卅八萬元投咗國學大師饒宗頤教授嘅「積善餘慶」墨寶，可謂適合不過。
卓妮