特區政府所作所為愈來愈令功夫茶覺得係祈福黨騙局，點解咁講？事關曾蔭權班子所有諾言幾乎冇一樣可以落實。就好似拍晒心口話要打造為經濟支柱之一嘅醫療產業咁吖，可信程度比起即將面世嘅盂蘭節鬼話連篇仲要低。
所謂醫療產業，離唔開增撥土地興建醫院，另外培訓大量醫護人員。問題係，現有醫護人員已經忙到七手八腳，想話要求醫管局解決人手荒咩？簡直係緣木求魚，等同於要求祈福黨賜你闔府平安。咁嘅情況之下，醫療產業淪為笑話。
呢嗱嗱嗱，內地孕婦繼續衝擊香港醫療系統，食衞局局長周一嶽以及醫管局袞袞諸公仍然苦無對策。大家可能會話，都唔係吖，醫管局咪已經落閘截龍囉，公立醫院對於內地孕婦來港產子設定上限，醫護人員鬆一口氣喇啩。表面上確係咁，可惜實際上唔係。喂，內地孕婦識得一招叫做硬闖急症室，唔到最後關頭都唔衝過去叫救命。大肚婆一旦硬闖，唔通你見死不救咩？
硬闖急症室問題愈來愈頭痛，今年上半年之嘛，已經有五百幾宗非本地孕婦衝入急症室產子個案，較去年同期三百宗增加八成。據估計，今年全年會有超過一千宗內地孕婦硬闖，你都咪話唔得人驚。你知啦，十萬火急臨盆在即先至搵人接生，呢家嘢對於母嬰雙方都非常危險，而對於醫護人員亦構成極大壓力，一個唔覺意難產就唔好啦。仲有一家嘢嚇鬼死你，內地孕婦南下入境最就腳嘅急症室設於北區醫院，而北區醫院係冇婦產科㗎！
難怪北區醫院怨聲載道，不滿醫管局至今並無任何應付措施向前線人員交代，佢哋擔心硬闖急症室產子個案持續上升，將會嚴重影響恒常服務。
如果你係一個宅心仁厚嘅司機，一聽到大肚婆要你送去冇婦產科嘅北區醫院，為咗人命關天着想，你會唔會改送佢去其他醫院呢？理論上應該係會嘅，問題係醫管局同消防處冇共識，救護車冇指引話一定要將大肚婆送去有婦產科嘅醫院。咁就大鑊嘞，生仔嗰個又危險，被生嗰個又危險，接生嗰個都危險，搞出人命唔知點算！
有冇辦法杜絕內地孕婦硬闖急症室呢？對唔住，係冇嘅，周局長等等醫療大官呆若木雞，莫講話冇辦法杜絕內地孕婦，連本地孕婦硬闖急症室都冇晒符。本地孕婦之所以要硬闖，無他嘅，預約床位供不應求吖嘛。
所以話啫，醫療產業係大笑話，特區政府係祈福黨。