政情：屈奇安被禁開會惹眾怒
新民黨尋日喺新蒲崗采頤花園開新辦事處，今次掛帥嘅係消防處救護員會總幹事屈奇安，一向不諱言積極考慮參選區議會嘅佢，係采頤「地頭蟲」，住咗呢度十幾年，○○年仲高票當選業委會主席。各方紀律部隊好友撐場，本應高高興興，但救護員會主席陳仕祺忍唔住呻「屈」，話消防處打壓救護員會。
屈奇安話，佢原本五月以總幹事身份代表救護員會同消防處副處長開會，點知消防處話個會係傾在職屬員嘅福利事宜，屈ＳＩＲ非現職，不宜出席會議。救護員會成班兄弟當然好㷫，認為代表應由工會自行委派，佢哋即刻去信公務員事務局、紀評、紀總、勞工界立法會議員同新民黨葉劉淑儀投訴。
救護員會話正等候公務員事務局局長俞宗怡發落，話如果今次先例一開，其他公務員團體亦會受影響，唔排除會向盟會國際公務勞連投訴。本報就事件曾向公務員事務局查詢，該局發言人回覆，承認接獲救護員會就派代表出席副處長會的申訴，現正向消防處了解事件的詳情。