政情：羅范講升學張宇人贈「興」
曾任教育統籌局常任秘書長嘅港區全國人大代表羅范椒芬尋日出席一個升學講座。佢搞教育令市民印象深刻，由佢嚟講升學，啲家長梗係踴躍發問啦。不過，有家長提到政府喺教育政策上成日改嚟改去唔知點算，主持講座嘅立法會議員張宇人就笑笑口話，教育政策改得最多就係羅太嗰陣，所以家長依家唔使咁擔心，意思即係話要改都已經改咗喇。佢一講完羅太立即收起笑容笑唔出，真係言者無心，聽者有意。
羅太尋日出席由自由之友搞嘅「子女成才之路入學篇」講座，喺拔萃男校舉行，講座由自由黨嘅張宇人主持，因為佢係男拔嘅校友。家長趁前教統局高官喺度都把握時間發問，有家長就話政府教育政策成日變，搞到好擔心。
羅太就話，教育政策經常改佢都無能為力，因為係關乎政治體制，不過佢都認為政府應該要有個長遠嘅規劃。
佢又畀貼士家長，話其實教育方面改得最多都係母語教學，而羅太到咗今日今時，都係家長母語教學。