政情：李運強慳自己加員工薪
人仔不斷攀升，港商喺內地設廠，經營成本愈來愈貴，令老闆叫苦連天。「造紙大王」理文造紙主席李運強就逆市加人工，佢話，睇唔過眼內地通脹驚人，人工大縮水，佢都心翳。
熱愛賽馬嘅李運強，尋日趁馬季煞科，入場輕鬆吓。李生營商有道，喺內地設有唔少造紙廠，由年頭至今，已加咗幾次人工，加埋有成十幾巴仙。呢個加幅，足以抵銷內地通脹有餘，認真慷慨。
李主席話，內地柴米油鹽樣樣加，工人收入變相縮水，為免佢哋無啖好食，一於慷慨加薪，等員工happy，返工都起勁啲。內地食品價格瘋狂漲價，有報道話，內地人連豬肉都食唔起，認真心酸。
但李主席一啲都無偏心，香港公司嘅員工亦獲加薪百分之四點五。連番加薪，李主席話佢唔敢將紙價提高，擔心會流失客人，惟有慳自己荷包。呢啲老闆，都幾少有。