政情：唐唐唔急田少急
全國人大常委范徐麗泰話考慮參選特首，特首選舉一事又搞到全城鬧哄哄。雖然范太民望高企，不過自由黨榮譽主席田北俊就力撐亦係「鐵三角」之一嘅政務司司長唐英年，話唐唐對商界好熟悉，會支持佢參選。不過依家真係皇帝唔急太監急喇，事關唐唐呢排「玩自閉」，對於選特首嘅事一直冇聲冇氣，照計立法會就快放暑假，佢係時候辭職參選。不過，之前七一成二十二萬人上街，唐唐作為政策把關人實在難辭其咎，「上海幫」見形勢不對換范太上場都唔奇，睇嚟唐唐匿埋可能真係有隱衷都唔定。
范太日前出來話考慮選特首，引起城中各界熱烈討論特首選舉。田少尋日就出嚟明撐唐唐，話商界比較接受唐唐係事實，皆因唐唐對商界十分熟悉，仲話「商界對佢當然有好感啦，會支持佢參選特首。」
另外，對於范太，田少就話范太做立法會主席時冇錯係處事公正，不過商界對范太嘅認識唔多，又指出范太嘅「弱項」︰「佢（范太）自己講對經濟唔熟悉。」
個個對選特首你一言我一語，但係被喻為「鐵三角」之一嘅唐唐反而無聲無氣，反而一直撐佢參選嘅范太連日積極發聲。雖然范太話未有信心參選，不過就歡迎其他人對佢嘅能力提出質疑同批評。范太又暗踩成日評論民生嘅行政會議召集人梁振英，佢話「講市民鍾意聽嘅說話唔難，關鍵在於如何落實市民嘅願景」，唔好得個「講」字。
唐唐低調或有難言之隱
范太同唐唐同屬「上海幫」，唐唐近排又涉及「偷步」競選風波，夕陽政府施政無能又引發七一有廿二萬人上街，用腳投票，作為政策把關人嘅唐唐都好難卸責。
喺咁嘅情況，佢舉棋不定，猶豫不決都唔奇，話唔定有難言之隱吖嘛。范太早前明明話支持唐唐，依家講到似層層自己要參選咁款，政治嘅嘢，變幻至係永恒呀。
趁熱鬧嘅仲有新民黨主席葉劉淑儀，佢尋日出席活動時就話，有市民、街坊叫過佢參選，不過離特首提名仲有一段時間，一切都係「言之過早」。唔通范太刺激到佢都考慮參選？點知葉劉覷準時機表態︰「我素來都係有志服務香港，我返嚟（香港）五年都係參加選舉啦、從低做起啦、做政策研究啦，所以我係唔需要喺某一個時刻先至開始研究㗎。」明明係衝住范太而嚟，寸爆！