政情：「白馬王子」莫樹錦拖女矚目
城中著名腫瘤科醫生莫樹錦，衣着一向「潮」，尋日落雨濕濕，佢照樣「白恤衫」加「白西褲」，成個白馬王子look入馬場，令現場一眾靚仔騎師都要「借歪」。
莫醫生外形煞食，原來佢囡囡已亭亭玉立，日前由加國返港度暑期，爸爸一於帶佢入場，見識吓香港「馬照跑」文化。乖女拍埋老竇身邊，唔知嘅人仲以為係一對戀人。
Keep Fit要開朗+飲食均衡
卓妮近睇，莫醫生面上的確連一條皺紋都無，胸肌結實，身形仲Fit過後生仔。唔通佢打咗Botox？非也！莫醫生笑笑口話，Keep Fit之道好簡單，就係心境開朗，多啲關心身邊嘅人；飲食方面，就要均衡。
聽落鬼咁簡單，莫醫生果然身體力行，早前隨宣明會踏足非洲做義工，將歡樂笑聲帶畀病人。但卓妮只可以講一句：青春常駐唔係咁容易，莫醫生，你的確得天獨厚。