香港真係一個奇怪到令人費解嘅荒誕社會，唔好計林公公瑞麟局長失驚無神整個替補機制，然後激發民憤跟住腳軟褪軚吖，淨係講兩樣嘢已經足以證明一切。
第一樣嘢係咁嘅，港人同胞明明唔鍾意生仔，出生率明明低到無倫，理論上所有願意傳宗接代嘅爸爸媽媽都應該受到五星級上賓待遇，醫療資源充裕吖嘛。哈，實情「笨」唔係咁喎，香港人生兒育女居然好似走難咁慘，左撲右撲都未必撲得到產科床位。鬼叫本地醫療官僚採用另類替補機制，一個二個「屁股替補腦袋」咩，完全冇周詳規劃之下，內地孕婦來港產子衝擊到醫療系統七零八落，港人爸爸媽媽淪為產科難民。
至於第二樣嘢，其實同第一樣有連帶關係。港人同胞明明唔鍾意生仔，出生率明明低到無倫，理論上所有求學讀書嘅小朋友都應該受到五星級上賓待遇，學校資源充裕吖嘛。到頭來，實情又「笨」唔係咁樣。
呢嗱嗱嗱，升中統一派位結果揭盅嘞，由於教育局今年重手推行中學自願減班政策，部分地區中一學額居然「減凸」。新學年有二百間中學減班，六千八百個中一學額從此消失，之但係咁，適齡學童只不過減少大約四千七百人。大家計計數，係咪等於二千一百個學生冇書讀呀？其中以荃灣以及葵青區學額嘅減凸情況最嚴重，新學年中一適齡學童人口預計下跌四百六十二人，不過區內將會有九百一十八個中一學額「被失蹤」。
既然減班減到凸一凸，後知後覺嘅教育局梗係要推出補鑊措施啦，所以就喺荃灣葵青區實施「每班多派一人」嘅臨時政策，希望盡量解決學額荒。
講到呢度，大家明唔明教育局係幾咁荒誕？出生率低導致學生人數減少，局方唔係順水推舟實施小班教學，亦唔係好好運用資源提升教學質素，呢一班同樣係「屁股替補腦袋」嘅官老爺反其道而行，佢哋要殺校，佢哋要減班，佢哋要喺庫房錢多到水浸嘅情況之下節省教育資源！
唉，減班政策如果唔係咁荒誕，都唔會激到前天文台台長林超英吹鬚睩眼啦。超英哥哥不滿母校英皇書院成為減班受害者，夾硬剝奪窮苦學生透過讀書識字向上爬嘅機會，義憤填膺不惜向自己嘅舊日同僚公然開火。
殺校減班已經不合情理，家陣仲要減班減到凸一凸，你話嘞，教育官僚係幾咁核鬼突？教育局局長孫明揚自己嘅屋企就加料僭建，作育英才嘅學校就清拆學額，荒誕程度堪稱地上最強！