中環出更：名人善長撐防癌會晚宴
名人圈，有唔少抗癌勇士，防癌會日前舉行籌款晚宴，患過急性血癌嘅機場管理局主席張建東（Marvin）精神奕奕現身。防癌會主席高永文醫生都放下接受腦下垂瘤手術病人嘅身份，為晚宴出錢又出力。Marvin話，癌魔不可怕，現今醫學日新月異，得病也要「Live in hope」（活在盼望中）。
籌款晚宴以「仲夏戀曲動人夜」為題，喺機場富豪酒店筵開逾五十圍，邀得世界著名男高音，及本地骨科醫生方津生大唱藝術歌。向來善心嘅富豪集團太子女羅寶文出錢但唔出名，拍心口贊助全場酒席，認真唔話得。
城中名人善長紛撐場，包括長實主席李嘉誠表弟莊學山一家三口、已榮休嘅滙豐銀行首任華人大班鄭海泉伉儷及千金Simone、行政會議成員梁智鴻伉儷，仲有八和會館主席汪明荃，場面星光熠熠。身為防癌會名譽副會長嘅鄭海泉太太捐得豪爽，係當晚綠寶石級贊助人。
場內仲有一位稀客，就係莊學山兒子阿Kai，佢外形俊朗，有名門公子風範，依家喺美國攻讀機械工程，成績優異。阿Kai明年畢業，莊氏家族顯赫，生意瓣數多，但媽咪希望囝囝憑實力闖一番事業，遲啲先安排佢接掌家族生意。
媽打投得廿萬鑽錶
晚宴高潮係慈善競投。太子珠寶鐘錶主席鄧鉅明捐出鑽石名錶作拍賣，由前民政事務局常秘李麗娟以十九萬八千元投得，隻錶市價逾廿六萬元，媽打一買就賺錢，真叻。
高永文當晚仲收到一張大支票，大慈善家譚正以譚雅士杜佩珍慈善基金名義，捐贈五百萬元予防癌會。高醫生感動到眼濕濕，佢慨嘆唔少癌症病人無錢醫病，一分一毫，都係救命錢。
卓妮