香港有三多，車多人多招牌多。外國攝影師一旦來港，除咗例牌登上山頂捕捉維港夜景之外，其中一項指定動作係拍攝五光十色又密密麻麻嘅霓虹燈招牌，證明呢家嘢係香港獨步全球嘅特色。
招牌多本來係繁榮昌盛嘅象徵，問題係，萬事萬物無法擺脫生老病死嘅自然法則。亦即係話，招牌係會老，同時亦會死，如果長期任由爛鬼招牌風吹日曬，一個唔覺意跌落街，隨時砸死人o架！
呢嗱嗱嗱，○八年就發生過咁嘅慘劇，灣仔一間泰國菜館一塊三百磅招牌，砰磅一嘢跌落街，砸死一名女途人。家陣已經進入颱風季節嘞，到底有幾多個吊吊揈嘅爛鬼招牌造成潛在危機呢？現時全港大約有十九萬個招牌，發展局局長林鄭月娥話喎，過去兩年已經清拆超過九千個有即時危險或非法豎立嘅招牌。
「好打得」局長聽落都幾生性，拆咗九千幾個危險招牌算唔話得啦。之但係可惜吖，原來全港星羅棋布嘅危險招牌唔止咁少o架。本報記者實地視察過深水埗、旺角、觀塘、土瓜灣以及筲箕灣，發現各區仍然有好多搖搖欲墜嘅危險招牌，當中以筲箕灣、觀塘同埋旺角情況最嚴重。好似筲箕灣東大街咁吖，有一個伸出路面六呎嘅超市招牌，底部鋁板已經剝落，商戶竟然只係用幾條尼龍繩綁住就算數，你都咪話唔得人驚。
大街大巷仲有咁多危險招牌，難怪立法會議員王國興發炮，批評政府辦事畏首畏尾，未有就規管伸出式及店面招牌盡快立法。
王議員係咁講嘅：「本身個招牌監管制度，會連埋強制驗樓及驗窗計劃法案一齊通過，但唔知政府做咩彈弓手，抽起咗留番下年度先傾！」王國興認為政府應盡快提交法案畀立法會審議，並且要求屋宇署加強巡查執法。
咦，咪住先，功夫茶諗起一筆舊帳。○八年金融海嘯嘅時候，曾蔭權煞有介事成立經濟機遇委員會，再煞有介事推出良方妙計，佢話喎，一於招聘人手拆招牌，咁就可以刺激經濟嘞。
冇錯，呢一個聰明笨伯嘅所謂大計確係詼諧滑稽，如果拆招牌可以刺激經濟，幫襯完鳳姐冇走數嘅嫖客都可以話自己出錢出力救港有功啦。之但係咁，好好醜醜都叫做特首落柯打，林鄭月娥冇切實執行，算唔算違抗命令呀？拖拖拉拉唔立法監管，又係咪失職呀？如果話危險招牌吊吊揈，一眾高官又係咪兩手揈揈呀？
計功夫茶話齋，林鄭月娥唔好再忤逆威信所餘無幾嘅煲呔曾，落足心機拆招牌，咁先至係為官之道吖嘛！