政情：大輝護主同僚狂窒
廠商會立法會議員林大輝被指係政務司司長唐英年嘅「家臣」，尋日佢就瞓晒身為唐唐涉嫌偷步競選醜聞辯護，但最後反被其他議員窒番轉頭。
公民黨黨魁梁家傑（袋巾傑）尋日喺立法會提出口頭質詢追瘦偷步競選醜聞，負責回應嘅政制及內地事務局局長林瑞麟繼續做「人肉錄音機」，始終未能釋除唐唐公私不分、涉嫌濫用公共資源偷步競選嘅疑慮。不過大輝發言時竟質疑袋巾傑參選過特首，係咪因為上次輸咗唔服氣，準備下屆捲土重來，先至利用立法會場合抹黑佢嘅疑似未來競選對手。
袋巾傑未及回應，同樣參選過特首嘅民主黨李永達已率先拔刀相助，投訴大輝揣測其他議員嘅發言動機，違反《議事規則》。立法會主席就仲寸，指大輝嘅發言根本同條問題毫無關係，議員官員都毋須作出回應，認真瘀皮！
唐唐繼續龜縮
至於事件主角唐唐就延續佢嘅連日快閃，佢主持完關愛基金督導委員會會議，借出席鄉議局新大樓開幕禮為由離開，冇同其他委員一齊見記者。記者提問，佢照舊當聽唔到，繼續龜縮。