政情：Greg蘇坐正出師失利
尋日首次以商務及經濟發展局局長身份出席立法會例會嘅蘇錦樑（Greg），面對議員嘅質詢，表現總算淡定。不過阿Greg等咗咁耐先守得雲開見月明「坐正」，尋日個會竟然冇議員恭喜佢，仲搞到要畀人民力量議員陳偉業（大舊）寸佢無恥，真係出師失利喇。
雖然政府遲遲未有時間表落實數碼廣播，不過尋日大舊就問定阿Greg遲啲有數碼廣播時會唔會為啲長者、唔同宗教信眾、弱勢社群等設立獨立電台、電視台，幾時先可以好似外國咁喺電視節目設手語服務。阿Greg就話港台已就設立唔同內容嘅頻道進行研究，年底做諮詢時就會公布，但係就冇答到手語服務嘅問題，淨係講咗句「冇補充」。
大舊怒斥無恥
大舊隨即扯火大鬧︰「手語係好基本嘅服務，可唔可以返去研究下？你一句冇補充就算數，你依家坐正局長喇喎，唔係無恥到手語呢樣都唔諗吓嘛？」雖然畀人鬧無恥，阿Greg都面不改容。畀人鬧而面不改容，可能就係做局長嘅基本功。