政情：李嘉誠：成功沒必然方程式
當「點解唔係李嘉誠？」係唔少人茶餘飯後嘅話題，原來被視為眾人偶像嘅長和系主席李嘉誠自己，都有留意呢個話題。李嘉誠作為香港首富，認為無人應該盲目模仿他人，但從其他人經驗悟出心得，都係不錯嘅成長教材。
最近李超人以汕頭大學校董會名譽主席身份，喺汕頭大學畢業禮上發表咗佢嘅「檸檬汁人生觀」，佢以自己做人嘅寶貴經驗，勉勵行將畢業嘅同學。
李超人話，佢小時候嘅生活條件，非常艱苦，但仍能喺品格個性、能力、情感同志趣嘅探索裏面，找到快樂滋味。亦即係話在重重困難嘅環境中都可以活出自己，要建立希望和信心，不要停滯在怨憤之中。
要將檸檬榨為汁
佢又話，喺佢成長嘅年代，喺殖民地主義下，香港社會艱苦，嗰時無社會安全網，飢餓與疾病嘅恐懼強烈逼人。喺咁嘅環境裏面，佢要認清楚乜嘢係貧窮嘅枷鎖，佢一定要有擺脫疾病、愚昧、依賴同惰性嘅方法。佢發現，專注尋找成功方程式唔係成功良方，反而減低失敗因素，至可以加大成功因數同倍數嘅機會。
李超人成功嘅秘訣，仲包括要持恒地終身追求知識，要經常保持好奇心同緊貼時勢增長智慧，從佢早年投資赫斯基到近年嘅Facebook同Spotify等，都係李超人緊貼時勢嘅明證。
仲有，李超人話無論喺言談、許諾同設定目標各方面，佢都慎思同嚴守紀律，一定不能畀人囂惰脆弱和倚賴嘅印象，咁嘅思維模式不但係對成就嘅投資，更可建立誠信。
李超人話，當機遇一現，「你已整裝待發，有本領和勇氣踏上前路。」佢又話「生命拋來一顆檸檬，你是可以把它轉榨為檸檬汁的人。」