中環出更：廣華醫生高中「頭獎」
唔少人羨慕高高瘦瘦嘅身形，服務咗廣華醫院廿五年嘅九龍西醫院聯網腦外科部門主管郭正光醫生就話唔使羨慕佢，五呎九吋高嘅佢，做親手術都畀手術燈撼頭，加上每日開工都要行上行落，運動量足想肥都難。
百年慶典 Band騷表演
尋日廣華醫院喺尖沙咀舉行百年慶典啟動禮，郭醫生同一眾廣華醫護人員組成嘅樂隊BandOne，即席表演佢哋為百歲生日而創作嘅一首主題曲《一起》，又彈Keyboard又彈結他嘅郭醫生高高瘦瘦好有台型，不過佢笑言，入親手術室，成日唔覺意畀頭頂嘅手術燈Kiss咗一啖，事關廣華醫院樓底唔夠高，搞到佢成日中頭獎。
其實廣華係百年老店，依家大部分建築物都係六十年代落成，入面嘅建築設計同空間運用都已經不合時宜，「中頭獎」睇怕唔止得一個得獎者。加上各個部門都分散喺唔同樓層，郭醫生每日返工都要行上行落，所以佢咁瘦就係咁解。
之但係醫生就話可以自幽一默當減肥啫，但係對病人就唔係咁講法，萬一上上落落喺梯間
口有咩唔舒服會好危險，亦影響醫護人員嘅工作效率。所以郭醫生好希望政府可以快啲批錢，等廣華醫院重建規劃快啲進行，令病人得到最好服務。