中環出更：林李婉冰買呔贈愛女
領呔係媽咪、老婆同囡囡最愛送嘅禮物之一，尋日就見到名媛林李婉冰喺金鐘太古廣場嘅Lanvin買呔，佢仲細心到帶咗件恤衫嚟揀呔，睇下邊條呔最好襯，不過林太唔係買畀爸爸、老公同囝囝，而係買畀囡囡，仲一買就買咗三條添。
揀埋謝師禮物
林家有女初長成，今年喺英國中學畢業，過幾日就舉行畢業禮，為咗報答老師嘅教導，林太特登喺香港幫囡囡揀謝師禮物，除咗領呔仲有袖口鈕送畀阿Sir，至於Miss，林太就揀咗手鏈，好有心思。成日畀囡囡投訴係大忙人嘅林太，尋日趁上機前作最後衝刺，認真係廿四孝媽咪。佢話囡囡鍾意英國大學嘅學術氣氛，所以會繼續喺嗰邊升學，至於揀邊間同咩科，就要睇囡囡嘅成績同意願，畀囡囡自由度自己揀。