中環耳目：羅智成借星級飯盒撐台食
光華新聞文化中心主任羅智成調派來港一年幾，推廣台灣文化不遺餘力，尋日中午佢喺光華寫字樓為十一月登場嘅「台灣月」活動做熱身宣傳，創意無限嘅佢又有新諗頭，特登搵同事去買米芝蓮星級台灣食肆鼎泰豐嘅排骨蛋炒飯等飯盒，大家一邊傾偈一邊歎台灣美食，別有一番滋味。
小吃結合美食論壇
今次嘅便餐一啲都唔簡單，除咗被羅智成稱讚頗有台灣風味嘅排骨飯之外，仲有好多開胃小菜，包括酸菜肉絲、雜錦豆乾同埋酸辣黃瓜，又有酸辣湯，十分豐盛。羅智成知道香港人為食，所以今年踏入第六屆嘅台灣月，首次引入台灣小吃結合美食論壇。
活動有唔少迎合年輕人嘅節目。例如台灣知名藝人張惠妹御用鼓王、被譽為兩岸錄音界鼓手第一把交椅李守信，將組團以爵士四重奏演繹台灣少數民族嘅古老曲調。主辦班底將喺尖沙咀文化中心戶外廣場炮製「香港海洋音樂祭」。