中環出更：超瓊只顧揀鞋跟得密友俞琤冇癮
賭王千金何超瓊（Pansy）離婚後情路崎嶇，年前同商台高層俞琤發展成閨中密友，關係耐人尋味。早前一個下午，呢位「跟得好友」陪Pansy去Shopping。素來我行我素嘅俞琤，陪睇兼陪試，不過忍耐都有個限度，好友試鞋沒完沒了，佢走先。
頂唔順走人
人前硬朗嘅Pansy，都有貪靚一面。早前一個星期六，佢同胞妹超鳳（Daisy）現身置地廣場，同行嘅仲有俞琤同友人，一共七人。成隊人入咗有鞋王之稱嘅Manolo Blahnik專門店。Pansy見鞋就試，俞琤就對女裝鞋全無興趣，雙手插褲袋企埋一邊等。
等等吓，俞琤終於頂唔順，拉兩位好友起身走人，留低何家姊妹慢慢揀。Pansy目送俞琤離開，鬼咁無癮，但轉頭見到靚鞋，即刻笑番，仲一口氣試足十幾對，忙到Sales氹氹轉。Pansy專攻OL至愛嘅密頭高跟鞋，對對有成四吋高；Daisy就偏愛平底鞋，佢見到新鞋忘晒形，一度着住「鴛鴦鞋」喺店內走來走去，詳細比較，睇吓邊個款好睇啲。
至於Pansy，每試一對新鞋，都走埋鏡前左照右照。試鞋期間，佢甚少詢問細妹意見，Daisy就不時問吓友人好唔好睇。
兩人喺店內揀足近半粒鐘，超瓊向Sales示意想買五至六對鞋，可惜部分鞋款未有貨，超瓊留低聯絡方法，只拎走一袋鞋走人，然後急急打電話，莫非想第一時間氹番「跟得密友」俞琤!?
講番鞋王Manolo Blahnik，佢嘅設計深得名人愛戴。由已故英國戴安娜王妃，到球星碧咸太太Victoria都係擁躉，佢矜貴在鞋底為人體腳掌設計，貴得有道理。
卓妮