民望江河日下嘅夕陽政府，淨係識做政府化妝術企圖將醜聞淡化，最新例子就係掩護疑似特首候選人、政務司司長唐英年涉嫌運用公共資源製作競選網站。話說政府新聞處喺前晚八點五十九分發表聲明，不點名指涉事嘅唐英年新聞秘書同另一名非公務員合約僱員無違規，由於茲事體大，作為負責任嘅傳媒當然喺第二日會跟進報道喇，咁啱遇正尋日行政會議開會，我哋直接向唐唐問個究竟，但係唐唐無論開會前後都好似借咗聾耳陳隻耳咁，問咩都當完全聽唔到。
及至同日下午，政府又突然倒瀉籮蟹咁將好多惹火事件，包括蘇錦樑署任商務及經濟發展局局長三個月後正式坐正，以及立法會出缺替補機制修訂等一次過拎晒出嚟，令傳媒疲於奔命，其中不得不提嘅係政制及內地事務局局長林瑞麟尋日下晝會見傳媒講替補機制安排時，唐唐咁啱喺佢後面行過，成件事巧合成咁，你話成個政府唔係夾埋同唐唐掩護醜聞都無人信喇！