政情：吳康民自爆四歲踎監
吳康民做過港區人大代表，但原來佢喺泰國坐過監，仲係年紀最細嘅囚犯。話說喺汕頭出世嘅吳康民，爸爸係共產黨員，因為國民黨剿共，佢就要跟住爸爸逃亡去泰國，點知泰國又話佢爸爸係革命黨，吳康民嗰陣得四、五歲，又冇人照顧，惟有跟埋爸爸去坐監，做最年幼囚犯。
康叔話佢自細已顛沛流離，爸爸被通緝時國民黨要屋企交四百大銀元作為捉到爸爸嘅獎金，真係又要畀錢，又要流亡。屋企為咗籌錢賣埋祖屋不特止，仲要賣埋堂妹去做妹仔，兩、三歲嘅佢已經要同爸爸展開流亡生涯。
吳爸爸喺泰國坐完監一家三口嚟咗香港，吳爸爸就喺報館寫文章。康叔話自己關心政治、鍾意文學都係受爸爸影響。佢十歲就學人寫「新西遊記」，「鍾意寫孫悟空做咩做咩，豬八戒又做咩做咩」咁。三歲定八十，細細個就咁識為人物作安排，唔怪得佢之前提出關於人大常委范徐麗泰、政務司司長唐英年同行政會議召集人梁振英嘅「鐵三角」論時咁有心得啦。